نزیکەی هەفتەیەکە نرخی زێڕ بە خێرایی رووی لە بەرزبوونەوە کردووە و ئە بەرزبوونەوەیەش تاوەکوو ئێستە بەردەوامە.
رۆژی دووشەممه کاتێک بازاڕەکە کرایەوە نرخی هەر ئۆنسێک لە زێڕی 24 عەیار بریتی بوو لە هەزار و 305دۆلار بەڵام ئێستە بە هەزار و 334دۆلار دەفرۆشرێت.
رێک هەفتەیەک لەمەوبەر نرخی هەر ئۆنسێک زیڕ بریتی بوو لە هەزار و 280 دۆلار و لەو ماوە کورتەدا زیاترلە 54دۆلار لە نرخی هەر ئۆنسێک زێڕ بەرز بووەتەوە.
بەگوێرەی dailyfx نرخی زێڕ بەرزترین نرخە کە لە ماوەی دوو مانگی رابردوو تۆمار کرابێت و گرنگترین هۆکاری ئەو بەرزبوونەوەیەش بۆ ئاڵۆزبوونی دۆخی ئابووری جیهان دەگەڕێتەوە.
لە جیهاندا هەر کاتێک لە بازاڕدا ناسەقامگیری بێتە کایەوە ئەوا ئاستی داخوازی بۆ کڕینی زێڕ زۆر و چالاکی ئابووریش کەم دەبێتەوە و کاتێکیش زێڕ داخوازییەکی زۆری لەسەر دەبێت ئەوا نرخەکەی روو لە هەڵکشان دەکات.
جەنگی ئابووری نێوان ئەمەریکا و چین تا دێت گەرمتر دەبێت و خەریکە رەهەندی تری مەترسیدار بە خۆیەوە دەگرێت. ئەمەریکا بەرانبەر بە مەکسیکیش کۆمەڵێک رێوشوێنی توندی ئابووری گرتووەتە بەر و سزای بەسەر کاڵاکانیدا سەپاندوون.
ئەگەری دابەزاندنی سوودی بانکی لە لایەن بانکی ناوەندیی ئەمەریکا و دابەزینی نرخی دۆلار بە هۆکارێکی تری بەرزبوونەوەی نرخی زێڕ هەژمار دەکرێت.
Kurdish