حكومه‌تی هه‌رێم بڕی 90 ملیار دینار بۆ ده‌ستپێكردنه‌وه‌ی شه‌قامی 100 مه‌تری له‌سلێمانی ته‌رخانده‌كات، ئه‌ندامێكی فراكسیۆنی یه‌كێتی له‌په‌رله‌مانی كوردستانیش رایده‌گه‌یه‌نێت: له‌ئاینده‌یه‌كی نزیكدا هه‌وڵی ته‌واو ده‌درێت بۆ جێبه‌جێكردنی ئه‌و پڕۆژه‌یه، كه هه‌وڵه‌كان ئه‌نجامی ده‌بێت و پڕۆژه‌كه‌ش به‌گه‌ڕده‌خرێته‌وه.
زیاد جه‌بار، ئه‌ندامی فراكسیۆنی یه‌كێتی له‌په‌رله‌مانی كوردستان، رایگه‌یاندوە: ده‌مێكه دركمان به‌وه كردووه كه ناهاوسه‌نگی و جیاوازی له‌پێشكه‌شكردنی خزمه‌تگوزاری بۆ شاره‌كانی هه‌رێمی كوردستان هه‌یه، بۆیه به‌دڵنیاییه‌وه له داهاتوودا قسه له‌سه‌ر گه‌ڕانه‌وه‌ی هاوسه‌نگی له‌پێشكه‌شكردنی خزمه‌تگوزارییه‌كاندا ده‌كرێت.
وتیشی: «پڕۆژه‌ی شه‌قامی 100 مه‌تریی سلێمانی، یه‌كێكه له‌و پڕۆژانه‌ی چه‌ند جارێكه باس له ده‌ستپێكردنه‌وه‌ی ده‌كرێت، بۆیه له داهاتوویه‌كی نزیكدا به‌دواداچوونی بۆ ده‌كرێت و هه‌وڵی ته‌واویش ده‌ده‌رێت بۆ جێبه‌جێكردنی، كه دڵنیام هه‌وڵه‌كان ئه‌نجامی ده‌بێت و ئه‌و پڕۆژه‌یه به‌گه‌ڕده‌خرێته‌وه».
له‌لایه‌ن خۆشییه‌وه، زیاد حمه ره‌زا، جێگری سه‌رۆكی لیژنه‌ی خزمه‌تگوزاری و شاره‌وانی و گواستنه‌وه‌و گه‌یاند له‌ئه‌نجومه‌نی پارێزگای سلێمانی، رایگه‌یاندوە: حكومه‌تی هه‌رێم بڕی 90 ملیار دیناری وه‌ك گوژمه‌ی یه‌كه‌م بۆ جێبه‌جێكردنی پڕۆژه‌كه ته‌رخانكردووه‌و خراوه‌ته‌سه‌ر بودجه‌ی پارێزگای سلێمانی بۆ ده‌ستپێكردنه‌وه‌ی شه‌قامی 100 مه‌تری».
وتیشی: «ئاگاداری خه‌رجكردنی پاره‌كه نین، ده‌زانین كه خراوه‌ته‌سه‌ر بودجه‌ی پارێزگای سلێمانی، بۆئه‌وه‌ی پارێزگار ده‌ستبه‌جێبه‌جێكردنی پڕۆژه‌كه بكات».
Kurdish