بەهۆی قەدەغەكردنی هەناردەی تەماتە لە لایەن ئێرانەوە بۆ سنووری سلێمانی لە ماوەی دوو رۆژدا، نرخی تەماتە لە 500 دینارەوە بۆ هەزار و 500 دینار بەرز بووەتەوە و عەلوەی سلێمانیش دەڵێت، نرخی تەماتە دەگاتە دوو هەزار و 500 دینار.
ئەمڕۆ شەموو دووی ئادار، سەروەر عەلی سەرۆكی سەندیكای كاسبكارانی عەلوەی سلێمانی راگەیاند، ماوەی پێنج رۆژە ئێران هەناردەكردنی تەماتەی بۆ سنووری سلێمانی لە مەرزەكانەوە راگرتووە و تەماتە نانێرێت بەهۆی ئەوەی بەرهەمی ناوخۆی كەم بووەتەوە.
زیاتر وتی، قەدەغكردنی ناردنی تەماتە راستەوخۆ كاریگەری لەسەر بازاڕی تەماتە دروست كردووە و نرخەكەی دەست بەجێ بەرز بووەتەوە، چونكە تەماتە سەوزەیەكی هەمیشە پێویستی هاووڵاتییانە كە رۆژانە بەكاری دەهێنن.
روونیشی كردەوە كە پێشتر یەك كلیۆ تەماتە لە عەلوە بە 400 دینار دەفرۆشراو لە بازاڕ كیلۆی 500 دینار بوو یان كیلۆ نیوێك بە هەزار دینار بوو، بەڵام ماوەی دوو رۆژە تەماتە لە عەلوەی سلێمانی بە هەزار دینار دەفرۆشرێت و لە بازاڕدا بۆ هەزار و 500 دینار بەرز بووەتەوە، بەو شێوەیە بەردەوام بێت تا نەورۆز بۆ دوو هەزار و 500 دینار گران دەبێ ئەوە لەكاتێكدا نرخی گۆشتی مریشك كیلۆی بە دوو هەزار دینارە كەمترە.
پێشتر بەرپرسانی ئیداری لە سلێمانی ڕایان گەیاندبوو كە ڕێ نادەن نرخی تەماتە زیاتر گران بێت و ڕێی تر بۆ هاوردە كردنی دەدۆزنەوە.
Kurdish