نرخی نەوتی خاو دابەزینی تۆمارکرد

نرخی نەوتی خاو لە بازاڕەکانی جیهان لەکاتی داخستنی بۆرسەی جیهانی لەسەدا دوو دابەزینی بەخۆوەبینی.

بەپێی ئاژانسی هەواڵی رۆیتەرز، نرخی نەوتی خاو لە بازاڕەکانی جیهان لەسەدا دوو دابەزینی تۆمارکرد، ئەوەش بەهۆی کەمبونەوەی خواست لەسەری و کەمبونەوەی کڕیار لە ئاستی جیهاندا.

کەمبونەوەی چالاکی کارگە پیشەسازییە گەورەکانی ئەمریکا و خاوبونەوەی گەشەی ئابوری جیهانی کاریگەری زیاتری بەسەر هۆکارەکانی دیکەی وەک سزاکانی سەر ئێران و ڤەنزوێلا و کەمکردنەوەی بڕی نەوت لەلایەن رێکخراوی ئۆپێکەوە هەیە، ئەوەش وای لە پسپۆڕانی ئابوری کردوە گەشبین نەبن بە بەرزبونەوەی زیاتری نرخی نەوت لەمساڵدا.

نرخی بەرمیلێک نەوتی تەکساس 1.42 دۆلار دابەزی، کە دەکاتە لەسەدا 2.5ی نرخەکەی، بەوەش نرخی نەوتی تەکساس بو بە 55.80 دۆلار، دابەزینی ئەمجارەی نرخی نەوت پاش ئەوە دێت کە هەفتەی رابردو گەیشتە بەرزترین ئاستی خۆی لەماوەی سێ مانگی رابردودا.

بەهەمان شێوە نرخی هەر بەرمیلێک نەوتی برێنت 1.24 دۆلار دابەزینی تۆمارکرد کە دەکاتە 1.9ی نرخەکەی و بەوەش لە 65.07 دۆلاردا جێگیربوو.