بە بەشداری زیاتر لە 200 کۆمپانیای گەشتیاری یەکەمین دیداری نێرگزی گەشتیاری لە هۆتێل گراند ملینیۆم ئه‌نجامده‌درێت.
دیداره‌كه ئه‌مڕۆ پێنجشه‌ممه 21ى شوباتى 2019، بە چاودێری قوباد تاڵەبانی، جێگری سەرۆکی حکومەتی هەرێم و بە بەشداری زیاتر لە 200 کۆمپانیای گەشتیاری ناوخۆیی و عێراقی و وڵاتانی دوروبەر و ئەوروپا دەستیپێکرد و یاسین ڕەحیم فەرەج جێگری سەرۆکی ژووری بازرگانی و پیشەسازی سلێمانیش تیایدا بەشداربوو.
لەسەرەتای دیدارە گەشتیارییەکەدا لەبەردەم هۆڵەکە، پێشانگەی فۆتۆگرافی گەشتیاری و کاری دەست نمایشکران.بۆ یه‌كه‌مجارە دیدارى گه‌شتیارى له سلێمانى ئەنجامدەدرێت له نێوان كۆمپانیا گه‌شتیارییه‌كانى باشور و ناوه‌ڕاستى عێراق، ئێران، هۆڵه‌ندا و لوبنان.
دیداره‌كه بە بەشداری زیاتر لە 200 کۆمپانیای بواری گەشتیاری ناوخۆیی و عێراقی و وڵاتانی دوروبەر و ئەوروپا ئەنجامدەدرێت کە تێیدا وه‌به‌رهێنه‌كانى بوارى گه‌شتیارى ناوخۆ و ئه‌و وڵاتانه به‌شدارده‌بن، بۆ ئه‌وه‌ى ئاگادارى بوارى گه‌شتیارى سلێمانى بن و هانیش ده‌درێن وه‌به‌رهێنان له بوارى گه‌شتیارى له شاره‌كه‌مان ئه‌نجامبده‌ن، ماوه‌ى شه‌و و رۆژێك به‌رده‌وامده‌بێت بۆ ئه‌وه‌ى بتوانن گروپى گه‌شتیارى زیاتر بهێننه سلێمانى و جوڵه‌ى گه‌شتیارى زیاتر بۆ ئه‌م شاره دروستبكه‌ن و به‌هۆیه‌وه خاوه‌نكاران و خاوه‌ن پڕۆژه گه‌شتیارییه‌كان سوودێكى زیاتر وه‌ربگرن.
بریاریشه ئەمڕۆ کۆمپانیاکانی بواری گەشتیاری و لایەنە پەیوەندیدارەکانی حکومەت و دەزگا ئەمنییەکان کۆدەبنەوە، بۆ ئەوەی ئەو گرفتانەی کۆمپانیا گەشتیارییەکان لەکاتی هاتنی گەشتیار هەیانە چارەسەربکرێن، ئەمشەویش لە هەمان هۆڵ ئەو کۆمپانیایانە خەڵات دەکرێن کە زۆرترین گەشتیاریان بۆ پارێزگای سلێمانی هێناوە.
Kurdish