نووسینگەی سەرۆکوەزیران رایگەیاند، ئەنجوومەنی وەزیرانی عێراق رەزامەندیی نیشاندا لەسەر ھەموارکردنەوەی یاسای دەستبەسەرداگرتنی سەروەت و سامانی گواستراوە و نەگواستراوی سەرانی رژێمی پێشوو.
لەراگەیەندراوێکدا نووسینگەی سەرۆکوەزیران عادل عەبدولمەهدی ئاماژەی بەوە کردووە کە ئەنجوومەنی وەزیرانی عێراق رەزامەندیی نیشاندا لەسەر ھەموارکردنەوەی یاسای دەستبەسەرداگرتنی سەروەت و سامانی گواستراوە و نەگواستراوی سەرانی رژێمی پێشوو، سەدام حوسێن.
هاوکات لە راگەیەندراوەکەدا ئاماژە بەوە دراوە کە لە کۆبوونەوەی ئاسایی خۆیدا، رەزامەندیی نیشانداوە لەسەر پڕۆژە یاسای ھەموارکردنەوەی یەکەم بۆ یاسای دەستبەسەرداگرتنی سەروەت و سامانی گواستراوە و نەگواستراوی سەرانی رژێمی پێشوو بە ژمارە ٧٢ بۆ ساڵی ٢٠١٧ .
لەلایەکی دیکەشەوە بەپێی راگەیەندراوەکە دوای نیشاندانی رەزامەندییەکە، ھەموارکردنەوەی یاساکە رەوانەی ئەنجوومەنی نوێنەران دەکرێت بۆ ئەوەی پەسەند بکرێت و وەک یاسایەکی نوێ جێبەجێ بکرێت.
شایەنی باسە وردەکاری زیاتر لەبارەی ھەموارکردنەوەکە نەخراوەتەڕوو، بەتایبەتیش بەپێی یاساکەی ئێستا دەست بەسەر سامانەکانی سەرانی رژێمی پێشتووتردا، گیراوە.
Kurdish