كۆماری ئیسلامیی ئێران، بۆ چەندهەمین جار، یەك ملیۆن بەرمیل نەوتی خاوی بە نرخی 56 دۆلار و 24 سەنت لە بۆرسەی وزەی تاراندا بۆ فرۆشتن خستەڕوو، بەڵام كڕیاری نەبوو.
ئاژانسی هەواڵی وزەی ئێران سانا، بڵاوی كردەوە، كۆمپانیای نەوتی نیشتمانیی ئێران، بۆ جاری سێیەم لە بۆرسەی وزەی تاراندا نەوتەكەی بۆ فرۆشتن بە كۆمپانیا تایبەتەكان خستوەتەڕوو، بەڵام هیچ كڕیارێكی نەبووە.
بڕی ئەو نەوتەی خراوەتەڕوو بۆ فرۆشتن، یەك ملیۆن بەرمیل نەوت بووە و نرخی 56 دۆلار و 24 سەنت بۆ هەریەك بەرمیل لە بۆرسەكەدا دیاری كراوە، ئەوەش لەكاتێكدایە یەك بەرمیل خاوی برێنت لە بازاڕە جیهانییەكاندا بە 62 دۆلار و 72 سەنت مامەڵەی پێوە دەكرێت.
پێشتر چەند جارێك ئێران نەوتەكەی لە بۆرسەی وزەی تاراندا فرۆشتوە و فرۆشتنەكانیش رێژەی سەدا 20ی بە تمەن و رێژەی سەدا 80ی بە دۆلار بوو.
حكومەتی تاران بۆ تێپەڕاندنی سزاكانی ئەمریكا لە تشرینی یەكەمی ساڵی رابردوەوە نەوتەكەی لە بۆرسە دەخاتەڕوو بۆ فرۆشتن.
Kurdish