به هۆی ئه‌و شه‌پۆله بارانبارینه به‌خوڕه‌ی هه‌فته‌ی رابردوو ناوچه‌كه‌ی گرتبووه‌وه مه‌ترسی ئه‌وه هه‌یه پردی داقوق بڕووخێت كه درێژترین پردی عێراقه و هه‌ردوو پاریزگای كه‌ركووك و به‌غدا به‌یه‌كه‌وه ده‌به‌ستێته‌وه.
به‌ڕێوه‌به‌ری فه‌رمانگه‌ی رێگا و پردی پارێزگای كه‌ركووك، كایماز ده‌میرجی راگه‌یاند، به هۆی ئه‌و لافاوه‌ی له ئاكامی ئه‌و بارانبارینه به‌خوڕه‌ی ناوچه‌كه‌ی گرتبووه‌وه زیان به‌ر پردی داقوق كه‌وتووه كه درێژیه‌كه‌ی یه‌ك كیلۆمه‌تره.
کایماز ده‌میرجی ئاماژه‌ی به‌وه دا، پرده‌كه له‌سه‌ر ٢٣ پایه بونیات نراوه و وتی: “له‌گه‌ڵ به‌رزبوونه‌وه‌ی ئاستی ئاو به‌شی خواره‌وه‌ی پایه‌كانی پرده‌كه زیانیان به‌ركه‌وتووه و مه‌ترسی رووخانی پرده‌كه ئێجگار زۆر بووه”.
ناوبراو تیشكی خسته سه‌ر ئه‌وه‌ی وه‌ك گرتنه‌به‌ری رێوشوێنی پێویست به شێوه‌یه‌كی كاتی هاتوچۆی ئۆتۆمبێله بارهه‌ڵگره‌كانیان راگرتووه به‌سه‌ر پرده‌كه‌دا و له نزیكترین كاتدا ده‌ست ده‌كه‌نه‌وه به نۆژه‌نكردنه‌وه‌ی پرده‌كه.
Kurdish