پسپۆرانی بواری نه‌وت و وزه پێیان وایه له‌م هه‌زاره‌ی ئێستادا نه‌وت ده‌توانێت پێگه‌ی خۆی بپارزێت، وه‌ك چۆن له‌سه‌ده‌یی رابردوودا توانی پارێزگاری له‌و پێگه‌یه بكات، چونكه وڵاتانی به‌كاربردنی نه‌وت بۆ دابینكردنی پێداویستی وڵاته‌كانیان له وزه زیاتر پشت به‌م كاڵایه ده‌به‌ستن، به‌تایبه‌تی نه‌وتی وڵاتانی كه‌ندا‌و سعودیه كه تیچوونی به‌رهه‌مهێنانی به‌راورد به‌نه‌وتی روسیا و ده‌ریای قه‌زوین‌وده‌ریای باكور كه‌متره.
هه‌روه‌ك تا ئێستا چین و ژاپۆن و هندستان و چه‌ندین وڵاتانی تر پشت به‌نه‌وت ده‌به‌ستن و رێژه‌ی به‌كارهێنانی زێڕ ڕه‌شیش له‌م وڵاتانه ساڵ له‌دوای ساڵ له هه‌ڵكشاندایه، بۆیه پێشبینی ده‌كرێت له (2013)دا نرخی نه‌وت پێگه‌ی خۆی بپارێزێت و نرخی یه‌ك به‌رمیلیشی بكه‌وێته نێوان (90 بۆ 110) دۆلار، ئه‌گه‌ر رێكخراوی ئۆپیك ئاستی به‌رهه‌مهێنانی ئێستای به‌جێگیری هێشته‌وه و به‌رده‌وامیشیدا به گفتوگۆكانی له‌گه‌ڵ وڵاتانی به‌رهه‌مهێنه‌ری نه‌وت كه له‌ده‌ره‌وه‌ی ئۆپیكدان.
له‌باره‌ی ئه‌و فاكته‌رانه‌ی كاریگه‌ریان هه‌یه بۆ سه‌ر نرخی نه‌وت، پسپۆرانی وزه ئاماژه به‌وه‌ده‌ده‌ن كه سیاسه‌تی خواست و خستنه‌ڕوو، رێژه‌ی گه‌شه‌ی ئابووری جیهان و پێداویستی وڵاتانی به‌كاربه‌ری نه‌وت و یه‌ده‌گی ستراتیژیان له‌نه‌وت له‌پاڵ یه‌ده‌گی گه‌وره به‌كاربه‌رانی نه‌وت وه‌ك ویلایه‌ته یه‌كگرتوه‌كانی ئه‌مریكا و چین و هندستان ڕۆڵیان هه‌یه له‌دیاریكردنی نرخی نه‌وت له‌بازاڕه‌كانی جیهاندا.
Kurdish