بەڕێوەبەرایەتی کارەبای سلێمانی داوای لە خاوەن مۆلیدە ئەهلییەکان کردووە، کاتژمیر ٨ و ٣٠ خولەکی بەرەبەیانی ڕۆژی شەممە، ٢٥ی ٨ی ٢٠١٨ لەبەردەم مۆلیدەکانیان ئامادەبن بۆ خوێندنەوەی کاتژمێرەکانی کارکردنی مانگی هەشت.
ئەوەش لە کاتێکدایە کۆتایی مانگی ڕابردوو نوێنەرانی سەرپەرشتیارانی مۆلیدە ئەهلییەکانی پارێزگاکانی هەولێر و سلێمانی و دهۆک و هەڵەبجە لەگەڵ قایمقامی هەولێر کۆبوونەوە و چەند بڕیارێکیان لەبارەی یەکخستنی نرخی مۆلیدە ئەهلییەکان دەرکرد.
لە کۆبوونەوەکەدا بڕیاردرا کە نرخی مۆلیدە بەپێی داتابەیسێک دەبێت کە تیایدا سەرجەم بڕەکانی کارکردنی مۆلیدەکان و هەموو فاکتەرەکانی یەک دەبێت، جگە لە نرخی گاز و کاتژمێرەکانی کارکردن کە جیاواز دەبێت، هەروەک بڕیاریشدرا ڕۆژی ڕاگەیاندنی نرخی مانگانەی مۆلیدە یەکبخرێت.
هەر لە کۆبوونەوەکەدا ئاماژە بەوەکرا کە پێویستە خاوەن مۆلیدەکان لە هەر چوار پارێزگاکە پابەندی نرخ بن، بەپێچەوانەوە بەرپرسیار دەبن و ڕووبەڕووی یاسا دەبنەوە.
کەمبوونەوەى بەرچاوى کاتژمێرەکانى پێدانى کارەباى نیشتمانى لە وەرزی هاویندا، بەرزبوونەوەى بەرچاوى نرخى کارەباى مۆلیدە ئەهلییەکانى لێکەوتووەتەوە.
لەو چوارچێوەیەشدا بەڕێوەبەرایەتی کارەبای سلێمانى نرخى هەر ئەمپێرێک کارەبای مۆلیدە ئەهلییەکانی لەمانگى تەمموزدا، لەنێوان ١٦ هەزار و ٥٠٠ دینار بۆ ١٧ هەزار و ٥٠٠ دینار دیاری کرد، بەپێی کاتى کارکردنى مۆلیدەکان.
دیاریکردنى ئەو نرخە بۆ کارەباى مۆلیدە ئەهلییەکان کە بەرزترین نرخە لەماوەى ئەمساڵ و چەند ساڵى رابردوودا، نیگەرانى هاوڵاتیانى لێکەوتووەتەوە و دەڵێن لەم بارودۆخە داراییە خراپەدا ئەو نرخە بارێکى قورس لەسەر شانیان دروستدەکات.
Kurdish