لەسەر بانگهێشتی ژووری بازرگانی هەرێمی کوردستان شاندێکی کارسازانی سعودیە سەردانی هەولێر دەکەن و دیدارێک لەگەڵ کارسازانی کوردستان ئەنجامدەدەن.
دارا جەلیل خەیات، سەرۆکی یەکێتیی ژوورە بازرگانی وپيشەسازيەکانی ھەرێمی کوردستان بە (تۆڕی میدیایی رووداو)ی راگەیاند، لەسەر بانگهێشتی فەرمی حکومەتی هەرێمی کوردستان و ژووری بازرگانی هەرێمی کوردستان ئەمڕۆ دووشەممە 23-7-2018 شاندێکی کارسازانی شانشینی سعودیە لەڕێگەی فرۆکەخانەی نێودەوڵەتیی هەولێرەوە گەشتنە هەرێمی کوردستان و ڕۆژی سێشەممە ٧/٢٤ لەگەڵ کارسازانی هەرێمی کوردستان دیدارێک سازدەکەن.
دارا جەلیل خەیات راشیگەیاند، شاندەکەی سعودیە پێکهاتووە لە سەرۆکی ژووری بازرگانی و چەند گەورە وەبەرهێنەرێک لە بوارەکانی وزە و بیناسازی و خۆراک.
بڕیارە شاندە سعودییەکە لەگەڵ کارسازانی هەرێمی کوردستان دیدارێک بۆ خستنەڕووی پڕۆژەی وەبەرهێنان لە هەرێمی کوردستان رێکبخەن.
Kurdish