ئەحمەد سەحاف وتەبێژی وەزارەتی دەرەوەی عێراق بە ئاژانسی فەرمی عێراقی وتووە، “شاندەکە ئەندامانی کەرتە دارایی و بانکییەکان لەخۆدەگرێت و لەگەڵ لایەنی ئەمریکیدا باسی کۆمەڵێک هەلومەرج و گیروگرفت دەکەن کە جێگای گرنگی هەردوولایە ئەمەش بەگوێرەی رێککەوتننامەی ستراتیجی نێوان هەردوولا دەبێت بە لەبەرچاوگرتنی بەرژەوەندییەکانی نێوان بەغد و واشنتۆن.“
سەحاف ئاماژەی بەوەشکردووە، چەندین بابەتی بنچینەیی هەن پێویستە باسیان لێوەبکرێت کە پەیوەستن بە لایەنی دارایی و بانکی و بەرزبوونەوەی بەهای دۆلار و هاوکاری و هەماهەنگی لەم بابەتانەدا لەگەڵ لایەنی ئەمریکیدا، جگە لە پەیوەندییە دووقۆڵییەکان کە بەشێک دەبێت لە مەبەستی سەدانەکە.
باسی لە سەردانەکەی محەمەد شیاع سودانی سەرۆکی حکومەت بۆ پاریسیش کرد و وتی، “پەیوەندییەکانی نێوان هەردوو وڵاتی لە قۆناغێکەوە بۆ قۆناغێکی دیکەی ستراتیجی فرە رەهەند گۆڕی.”
بە گوێرەی زانیارییەکان، بڕیارە لە حەوتی ئەم مانگە بانکی ناوەندیی عێراق لە واشنتۆن بۆ تاوتوێکردنی پرسی دابەزینی بەھای دیناری عێراقی بەرامبەر بە دۆلار لەگەڵ بەرپرسانی بانکی فیدراڵیی ئەمریکا کۆببێتەوە.
ماوەی زیاتر لە مانگێکە بەهای دیناری عێراقی بەرامبەر بە دۆلار ناجێگیرە، بەردەوام بەهاکەی لە داکشاندایە، ئەمڕۆش بەهای ١٠٠ دۆلاری ئەمریکی ١٧٠ هەزار دیناری تێپەڕاند.
Kurdish