فارس عیسا، سەرۆكی نوێنەرایەتیی حكومەتی هەرێمی كوردستان لە بەغداد دەڵێت، “بەغداد ڕێكاری ئەملا و ئەولا دەبینێتەوە بۆ ناردنی پارە بۆ هەرێم، كە بریتین لە بابەتی سولفە و بابەتی قەرز ئەمانەش پێویستی بە رێكاری یاسایی و ئیداری هەیە تا تەواو بكرێت یان لە ئەنجومەنی وەزیران بڕیار لەسەر ناردنی بدرێت”.
فارس عیسا كە قسەی بۆ دەنگی ئەمریكا كردووە راشیگەیاند، “رۆژی چوارشەممە رێكارەكانی ناردنی 400 ملیارەكە كۆتاییپێهات و تەواومان كرد بۆ ژمارە حساب لە بانكی ڕەشید و لە بانكی رافیدەین و دوو گرێبەستی نێوان وەزیری دارایی هەرێم لەگەڵ هەردوو بانكەكان واژووكراون لەسەرەتای هەفتەی داهاتوو ئەو 400 ملیارە بۆ هەرێمی كوردستان رەوانە دەكرێت”.
ئاماژەی بۆ ئەوەش كرد، ” لەبەرئەوەی پێشتر هەندێك بڕیاری توند دژی خەڵكی كوردستان دراون لەوانە بڕیاری دادگای فیدڕاڵی كە بە بۆچوونی ئێمە بڕیارێكی سیاسی بووە، وا حساب دەكەین تۆزێك بۆ ئەوان قورسە ئەم بڕیارە تێپەڕێنن”.
Kurdish