بەهۆی بەردەوامی دابەزینی بەهای لیرە و بەرزبونەوەی نرخی وزە و کاڵاکان لەسەر ئاستی جیهان، مانگی رابردو هەڵاوسانی ئابوری لە تورکیا گەیشتە بەرزترین ئاست لە 24 ساڵی رابردودا کە بەڕێژەی 73.5% بوە، لەوانەش زۆرترین هەڵاوسان لە نرخی گواستنەوە و خۆراکدا دروستبوە.
پەیمانگای ئاماری تورکیا (TUIK) ئەمڕۆ هەینی دواین داتاکانی تایبەت بە رەوشی ئابوری وڵاتەکەی بڵاوکردەوە و رایگەیاند، لە مانگی ئایاردا نرخی کاڵاکان کە پێداویستی سەرەکین بۆ هاوڵاتیان بەڕێژەی 2.98% بەرزبونەتەوە.
بەگوێرەی ئامارەکان ساڵی رابردو نرخی گواستنەوە بەڕێژەی 108% و نرخی خۆراکیش بەڕێژەی 92% بەرزبوەتەوە، هەروەها نرخی ئەو کاڵایانەش بەرزبونەتەوە کە لەناوخۆدا بەرهەم دەهێنرێن، ئەوەش ئەرکی سەرشانی هاوڵاتیانی ئەو وڵاتەی بۆ دەستەبەرکردنی پێداویستییە سەرەکییەکانیان قورستر کردوە.
بەرزترین رێژەی هەڵاوسانی ئابوری لە تورکیا بۆ ساڵی 1998 دەگەڕێتەوە کە هەڵاوسانی ئابوری ساڵانە 76.6% بوە و ساڵی 2002ش هەڵاوسانی ئابوری ساڵانە 73.2% بوە، بەشێک لە هاوڵاتیان، لایەنەکانی ئۆپۆزسیۆن و ئابوریناسانیش باس لەوە دەکەن ئەو داتایانەی TUIK بڵاویدەکاتەوە دروست نین و هەڵاوسان لەو رێژەیە زیاترە.
هاوکات ئاژانسی ستاندارد ئەند پۆرس (standard and poors) کە دامەزراوەیەکی خزمەتگوزاری دارایی ئەمریکییە ئاماژەی بەوەکردوە، کەمکردنەوەی سودی بانکی و دابەزینی بەهای لیرە کاریگەری گەورە لەسەر هەڵاوسان دروست دەکەن.
ئەوەشی خستوەتەڕو، “پێشبینی نەرێنی دەکەین لەسەر داهاتوی لیرەی تورکی لە 12 مانگی داهاتودا، ئەویش بەهۆی گۆڕانکاری گەورە لە نرخی دراوەکان و هەڵاوسان ئەوە جگە لە نیشانەکانی سیاسەتی گشتی تورکیا کە لەچەندین شوێندا دژبەیەکی تێدایە”، لەدەرئەنجامیشدا داهاتی تاک کەمتر دەبێتەوە کە لەبنەڕەتدا لەساڵی 2013 ەوە ڕوی لە دابەزین کردوە.
Kurdish