داهاتی مانگانەی گومرگی عێراق گەیشتە بەرزترین ئاست بەراورد بە چەند ساڵی رابردو

دەستەی گشتی گومرگی عێراق رایگەیاند، بۆ یەکەمجار لە دوای چەندین ساڵ، داهاتی گومرگی لە سەرانسەری وڵاتدا گەیشتە سەری 99 ملیار دینار، ئەوەش لەکاتێکدایە گومرگ لەسەر چەندین کاڵای خۆراکی و بیناسازی هەڵگیراوە یان زۆر کەمکراوەتەوە.

دەستەی گشتی گومرگی عێراق لە راگەیەنراوێکدا باسی لەوەشكردوە، لەم کاتەدا رێکارەکانی تایبەت بە باجی گومرگی لەسەر کاڵا خۆراکییەکان هەڵگیراون و بڕیارەکەش لە مانگی ئازارەوە کەوتوەتەبواری جێبەجێکردنەوە.

ئەوەش هاتوە، بڕیارەکە سەرجەم کاڵا خۆراکی و پێداویستییە سەرەکییەکانی هاوڵاتیان دەگرێتەوە، ئەوەش بە ئامانجی هاوکاری هاوڵاتیان و چینی هەژاران تاوەکو گرانبونی نرخی جیهانی کاڵاکان، کاریگەری لەسەریان دروست نەکات.

دەستەی گشتی گومرگی عێراق دەڵێت، مانگی حوزەیرانی ئەمساڵ سەرەڕای ئەو رێکارانەش، بەڵام داهاتی گومرگی گەیشتە سەری 99 ملیار دینار، جەختیش دەکاتەوە لەوەی هەوڵەکان بە ئاڕاستەی باشترکردنی سیستمی گومرگی بەردەوام دەبن.