پاش بوژانەوەی خێرای نرخەكانی نەوت لە ساڵی 2021دا، گۆڕاوی ئۆمیكرۆنی كۆرۆنای نوێ پێشبینی ناڕۆشنی هێناوەتە ئاراوە بۆ بازاڕی وزە لە ساڵی نوێدا، وەك ئەوەی ڕۆژنامەی (وۆڵ ستریت جۆرناڵ) دەیڵێت.
نرخەكانی نەوت لە ساڵی ڕابردوودا گەیشتنە بەرزترین ئاست لە 2014وە، بەر لەوەی جارێكی دیكە حكومەتەكان لە كۆتاییەكانی تشرینی دووەم، بەهۆی گۆڕاوی ئۆمیكرۆنەوە گەشت سنووردار بكەن، ئەمەش پرسیار و گومانی هێناوەتە ئاراوە لەبارەی بەردەوامبوونی “زێڕی ڕەش” لە ئاراستەی بەرزبوونەوەكەی.
فرانسیسكۆ بلانش، سەرۆكی توێژینەوەی شمەك و لێدەرهێنراوەكان (مشتقات) لە (بانك ئۆف ئەمریكا) پێی وایە، ڕەنگە لە ساڵی 2022دا نرخەكانی خامی برێنت 100 دۆلار بۆ هەر بەرمیلێك تێپەڕێنێت و بگاتە 120 دۆلار، تەنها ئەوكاتە نەبێت كە زیادبوون لە حاڵەتەكانی داخڵبوون لە نەخۆشخانە بەهۆی ڤایرۆسی كۆڤید-19وە ڕووبدات، یان بڵاوبوونەوەیەكی زۆری ڤایرۆسی تاجی (هەر مەبەستی كۆرۆنایە) لە چین ڕووبدات، لەكاتێكدا وڵاتەكە گەورەترین كڕیاری نەوتی خامە لە جیهاندا.
تائێستا جیهان نەوتێكی كەمتر بەكاردەهێنێت بەراورد بە كاتی بەر لە بڵاوبوونەوەی كۆرۆنا، بەنزیكەیی 96.2 ملیۆن بەرمیلی ڕۆژانە لە 2021دا بەكارهێنراوە، بەپێی ئاژانسی نێودەوڵەتیی وزە.
بلانس پێشبینی دەكات خواست لەسەر نەوتی خام بگاتە ئاستی بەر لە بڵاوبوونەوەی پەتاكە (100 ملیۆن بەرمیل نەوتی ڕۆژانە) لە چارەكی سێیەمی ساڵی 2022دا.
هەروەك هەندێك لە بانكەكان پێشبینی بەرزبوونەوەی دیكە لە نرخەكانی نەوتدا دەكەن لە ماوەی ساڵانی داهاتوودا بەهۆی كەمیی وەبەرهێنان لە وزەی بەردین و گۆڕینی ئاراستەكە بەرەو وزەی جێگرەوە، لەنێویشیاندا زیادبوونی وەبەرهێنان لەبواری ئۆتۆمبێلی كارەبایی.
لەگەڵ بوژانەوەی ئابورییەكان لە ساڵی 2021دا، خواست لەسەر نەوت بەرزبووەوە، لەكاتێكدا تائێستا بەرهەمهێنەران ملیۆنان بەرمیلیان عەمباركردووە.
بازرگان و شیكارانی بواری وزە دەڵێن، ئۆمیكرۆن نابێتەهۆی ڕوودانی شۆك بۆ نرخەكانی نەوت و ئەو دۆخەی پاش كەرەنتین بەهۆی ڤایرۆسی كۆرۆناوە هاتەدی، كاتێك گرێبەستە دواخراوەكانی خامی ئەمریكی بۆ ماوەیەك بە سلبی (-) بوو.
هەر لە ڕاپۆرتەكەدا، ڕیبیكا بابین، گەورە ئاڵوگۆڕكاری وزە لە كۆمپانیای (CIBC)ی كاغەزە داراییەكانی ئەمریكا وتی، وەبەرهێنەران بەمدواییە نەوتیان فرۆشت بۆ كۆكردنەوەی قازانج، بۆیە دەڵێت، “ساڵێكی نایابمان بەڕێكرد لە بواری وزەدا”.
Kurdish