هەڕاجی ئیمان

          
لەوڕۆژەوە پەیامبەران باسی نامەکانی خودامان بۆ ئەکەن، پێمانئەڵێن خواوەند هیچ ناهەقیەک قبوڵ ناکات، کوردواتەنی خوا هەقی بزنی کۆڵ بەسەر شاخدارەوە ناهێڵێ، کەواتە ئەبێ هەمومان لەگەڵ هەق بین، دژی زوڵم‌و زۆر بین، بەڵام ئاسۆی فکری مرۆڤ چەقی نەبەستوەو گەڕاوە بەدوای ڕاستی‌و هەقیقەتەکاندا، کاتێک فەیلەسوفەکان‌و بیرمەندان لەژیان‌و خودی مرۆڤ وردبونەتەوە، پەییان بەزۆر نهێنی ناخی مرۆڤ بردوە توانیویانە نامەی پەیامبەران شیبکەنەوەو ڕەخنەشی لێبگرن، بەڵام ڕێبەران‌و پیاوانی ئاین بەردەوام دژی لێکۆڵینەوەی ڕەخنەیی بون، گەورەترین چەکێکیش کە بەکاریان هێنابێ ئەوە بوە ئەگەر دەست بۆ ئەو پرسە ببرێت، ئەوا کوفرەو دەرچونە لەڕێبازی ئاین، بەڵام بیر ڕوناکەکان لێکدانەوەیان بۆ ئەم بابەتە ئەوەیە کە ئەگەر زۆرینەی مرۆڤ لەسەر ئەم هەسارەیە درک بەڕاستیەکان بکەن، ئەوا بازرگانانی ئاین ڕیسوا ئەبن‌و دەست‌و پێ سپی ئەوەستن، بۆ بژێوی ژیانیان ئەبێ تورەکەی سواڵ بکەنە ملیان یان بەرەڵای سەر جادەو کۆڵانەکان بن. هەرکاتێکیش داوای فەتوا لەم بەناو ئاینپەروەرانە ئەکەیت، بەپێی ڕۆژگارو کات‌و شوێن‌و بەرژەوەندی دەسەڵاتداران‌و خۆیان فەتواو بڕیار لەدار دائەتاشن چۆنیان بوێت وا بای ئەدەن، بەکارهێنانی تەکنۆلۆژیای غەیرەدین حەڵاڵە بۆیان! لەوڵاتی کافراندا ئامادەن شان دابدەن ببنە مشەخۆر لەسەر حسابی ئەوکرێکارانەی کار ئەکەن‌و باج ئەدەن بلەوەڕێن، لەپاداشتی ئەو ڕیزگرتنەشیان خۆیان بتەقێننەوە یا بیانکوژن، ئەمە جگە لەنمەک بەحەرامی ناوێکی تری هەیە؟ 
ئەوەتا هەندێکیان نازناوی شەهید بەکچە شەڕڤانێک کە بەرگری لەکەرامەتی گەلێگ ئەکات بەڕەوا نابینن، بەبیانوی ئەوەی نوێژ ناکات وەک ئەوەی نوێژ تاکە ئەرکی ئاینی بێت، ئەوەی وەک خۆیان هەرچی خوا پێیناخۆشە ئەیکەن دوایی بەنوێژێک لەئاوی هەڵئەکێشن پاکی ئەکەنەوە، دروشمی ئەم بەناو ئاین زانانە ئەوەیە با هەژاران‌و ڕەشو ڕوت ببنە قوربانی دەسەڵاتداران خۆشیان خاکوپای ئەوان پاسەوانی سەروەت‌و دەسەڵاتیان بن، بەویستی زاڵم فەتوا ئەفەرمون، ئەم بابەتە بۆ بەرچاو ڕونیەکە کە لەم ڕۆژگارەدا پیاوانی ئاینی لەسەری هەرەمەکەوە پیادەی ئەکەن، ئەو دەمەی ڕێبەرانی دو ئاینی سەرەکی لەئاست جینۆسایدی گەلێکدا وەک ڕێوی دەمیان چۆتە کلیلە. لەوەش ناڕەواتر ئەوەیە شەرعیەتی پێئەدەن، ئەوەتا ڤاتیکان پێشوازی لەو کەمالیستە ئەکات کە بڕیاری قڕکردنی گەلێکی موسڵمانی داوە، بەتەنیا وشەیەکێش باسی ئەو قەتڵوعامە ناکات کە لەعەفریندا بەڕێوەئەچێت، ئەم هەڵوێستەی پاپای ڤاتیکان، کەنیسەی کاسۆلیکیی رۆژگاری دادگاکانی پشکنینی سەدەکانی ناوەڕاستمان بیرئەخاتەوە، کە کوشتارو غەدرو ناهەقیان بەرامبەر بەهەزاران مرۆڤی ئازادیخوازو روناکبیر کرد هەر لەنیوتنەوە بگرە تا دەگات بەمایکڵ ئەنجیلۆ - ئەو نیگارکێشە کارامەیەی لەکاتی دروستکردنی کەنیسەی سانپیترۆدا هەقدەست‌و کرێی ماندوبونەکەی خورا، یا ئەو فێڵ‌وفەرەجەی لەسەدەی پازدەدا لەخەڵکی ئاینپەروەرانی مەسیحییان کردو (پسوڵەی لێبوردن)یان پێفرۆشتون، نەک ڤاتیکانی سەردەمی دوای رێنسانس‌و هەوڵدانی بۆ سەقامگیرکردنی ئاشتی‌و ئارامیی لەسەرتاسەری جیهاندا لەنیوەی دوەمی سەدەی بیستەمەوە، دەنا لەم کاتەدا پێشوازی کردن لەئەردۆغان چ مانایەک دەبەخشێ کە رۆژانە فڕۆکە جەنگیەکانی دەنێرێتە سەر عەفرین،‌ تا قوتابخانەو نەخۆشخانەکانی ئەو شارۆچکە بێکەس‌و بێدەرەتانە بۆردومان بکەن‌و خوێنی خەڵکەکەی بڕژن لەسەر ئەوەی دەیانەوێ بەئاشتی‌و ئازادی بژین؟ چ مەسخەرەیەکە لەچرکەساتێکدا کە منداڵ‌و ژنانی عەفرین بەئاگری شەڕی ئەردۆغان دەسوتێنن‌، پاپا دێت‌و دەست دەخاتە دەستی ئەم دیکتاتۆرەوە کە بەخوێنی سەدان منداڵی کورد سورە‌و مەدالیای فریشتەی ئاشتی پێدەبەخشێت؟! 
لەکاتێکدا ڤاتیکان باش دەزانێت مێژووی تورکیا هەر لەسەردەمی عوسمانیەکانەوە تا ئەمڕۆ، مێژووی کوشتاری گەلانی بندەستیان‌و مێژووی شەڕەنگێزیی‌و داگیرکاریی‌و خەفەکردنی ئازادیی بووە، تەنانەت ڤاتیکانیش یەکێکە لەو وڵاتانەی کوشتاری ئەرمەنەکانی لەسەدەی رابردودا بە"جینۆساید" ناساندوە، کوشتارو جینۆسایدێک کە سەدان ساڵە لەلایەن دەسەڵاتدارانی تورکەوە دەرهەق بەکورد ئەنجامدەدرێت‌و ڤاتیکان‌و کۆمەڵگەی نێودەوڵەتیش چاوی خۆیان لەبەرامبەریدا داخستوە. ئێستاش بەهۆی هێرش‌و پەلاماردانی سەر عەفرینەوە - کە سمبولی پێکەوەژیانی ئاشتیانەی گەلان‌و ئایین‌و مەزهەبە جیاوازەکانی سوریا بو، لەبری ئەوەی ئەردۆغان وەک "تاوانباری جەنگ" بناسێنرێت، پاپا "فریشتەی ئاشتی"ی بۆ دەکات بەدیاریی!   
لەملاشەوە، دو مێزەری ئیسلام کە یەکێکیان ڕیشوسمێڵی غەرقکردوە لەخەنەو وسمەدا، کە وەک خۆیان ئەڵێن لەئاینی ئیسلامدا نێرینە نابێت موی سەرو ڕوی ڕەنگ بکات، لەبەرئەوەی حەرامە تەنها لەکاتی غەزادا ڕێگە پێدراوە، بۆیە  ئەپرسین جەنابی مامۆستای داکۆکیکار لەبێچوە سوڵتانێکی تەزویر، تۆ بڵێی بڕیاری جیهادی دابێت دژی کورد کە وەک ئەڵێن گوایە خۆشی کوردە، یا لەکوردستان بۆ ئێمە شتێک ئەڵێت لەلای برا قارداشەکانی مەقامێکی تر ئەڵێ، جا چیبێ لەدوڕویی‌و دوزمانی ناشیرینتر بێت بۆ پیاوێک کە بەفسکل‌و جبەوە ناوی زاناو ئاینزانی لەخۆی نابێ، یاخود مەلایەک کە هەم شێخ‌و هەم وتارخوێنی جومعەو جەماعەت بو لەکیمابارانەکەی هەڵەبجەدا، لەشاری لەندەن بۆ داکۆکی کردن لەدیکتاتۆرە تکریتیە گۆڕبەگۆڕەکە لەپێناو بەدەست خستنی ئۆتۆمبێلێکدا، جگە لەسوێندخواردن بەخوداو بەقورعان سێبەسێ تەڵاقیشی خواردبو کە سەدام کیمیاوی نەکردوە بەهەڵەبجەدا. 
بابپرسین ئەمانە دۆستی ئاینن یا دوژمن؟  ئەمانە جگە لەمشەخۆرانێک هیچی تر نین، ئەتوانین لەخۆیان بپرسین، ئایا نەتەوەی کورد لەبەنی ئادەمن؟ یا وەک خەڵکی سەر ئەم هەسارەیە ئەوانیش دەسکاری خودان؟ با دەنگ بەرز بکەینەوەو بڵێین ئەگەر مەخلوقی خودان بۆ کوشتن‌و جینۆسایدیان حەڵاڵ ئەکەن؟ خۆ ئەگەر لەهەسارەیەکی تریشەوە هاتون یا لەبەنی بەشەر نین ئەوا باسێکی ترە، یا دەنگێکی نوساو لەمزگەوتێکی هەولێرەوە لەپاڵ داکۆکیکردنیدا لەفەریکە سوڵتانێکی بەجێماو لەدەوڵەتی عوسمانلی دوابڕاوو لەگوێی گادا نوستو، باسی ئایفۆنەکەشی ئەخاتە ڕستەوە بێئەوی لەیادی بێت کە ئایفۆن گاورکردە ناوهێنانی حەرامە، بەڵام بەکارهێنانی بۆ دەست برێنی‌و هەڵگێڕانەوەی ژنی مێرددار دەست ئەداوعەیبی نیە، یا ئەوکاتانەی عەمامەیەکی شیعە مەزهەب ببوە کلیلسازو کلیلی بەهەشتی بەسەر ڕۆڵەی هەژاراندا ئەبەخشیەوە نەقڵی ئەو دنیای ئەکردن، بەڵام هەرگیز ئامادە نەبو کلیلێك لەو کلیلانە بداتە کوڕەکەی خۆی، وەک ئەوەی ئەو مردنە هەر بۆ هەژاران خولقابێت بێت، ئەبێت ئەوە لەلای خەڵکی ڕون بێت ئەمجۆرە نمونانە مرۆڤ لەئاین دور ئەخەنەوە، هەرگیز ئەمانە ڕاستگۆ نین نە لەگەڵ خودادا نەلەگەڵ مەخلوقی خودادا، ئەگینا بەڕێشی کێ ڕەوایە نزیکەی نەوەد هەزار مزگەوت بەبڵندگۆ دوعا بۆ قارداشێکی لەخۆبایی بکەن‌و پاکتاوی ڕەگەزی میلەتێک حەڵال بکەن لەژێر بەیاخی موساڵمانەتیدا، ڕەنگە کەس گلەیی لەئەمریکاو ڕوس‌و گشت وڵاتانی خاوەن هێز نەکات، بەو هۆیەی کە ئەوان عەلمانین‌و حساب بۆ بەرژەوەندیەکانی خۆیان ئەکەن‌و لەپێناویدا تەڕو وشک ئەسوتێنن، دنیا ئەکەن بەقەزاوەگێڕی چاڵە نەوتێک. بەڵام ئەی ڕێبەرانی ئاینەکان دڵنیا بن هەمو کەس ئەزانێت ئێوە نەئیسلامن نەمەسیحین. ئێوە هیچ نین جگە لەمشەخۆرێکی هەلپەرست بەولاوە، ئەمەی ئێوە ئەیکەن ئیمانداریی‌و خواپەرستی نیە، بەڵکو (هەڕاجی ئیمانە).

PM:02:58:13/02/2018




ئه‌م بابه‌ته 98 جار خوێنراوه‌ته‌وه‌‌