كورد بێ په‌یام، هه‌راوهوریاى بێ ئامانج!


ئێمه‌ى كورد دیار نیه‌ له‌ چ مێژوویه‌كدا نیشته‌جێ بووین، به‌ڵام ئه‌وه‌ى ئاشكرایه‌ كوردى كۆچه‌رى تا مێژوویه‌كی دره‌نگ له‌ گه‌رمیان و كوێستاندا بووه‌. ئه‌مه‌ش یه‌كێك بووه‌ له‌ دواكه‌وتنی عیمران له‌ مێژووى كۆمه‌ڵناسی كوردیدا، چونكه‌  عیمران به‌رهه‌می نیشته‌جێبوونه‌. نیشتجێبوونیش زه‌مینه‌ى پێویست و یه‌كه‌مینه‌ بۆ بنیادنانی شارستانێتی.

به‌هه‌رحاڵ سه‌ربارى ئه‌وه‌ى كه‌ كوردستان كۆنترین جێگایه‌ تیایدا مرۆڤــــ  ده‌ستیكردووه‌ به‌ كشتوكاڵ به‌ڵام به‌و پێیه‌ له‌ رووى په‌ره‌سه‌ندنه‌وه‌ نه‌ك هه‌ر دواكه‌وتووه‌ به‌ڵكو تاكو ئێستاش له‌ دواوه‌یه‌. ره‌نگه‌ بپرسین بۆ؟ به‌ڵام دیسان وه‌ڵامی ئه‌وه‌ش پێویستی به‌ توێژینه‌وه‌ى ورد هه‌یه‌. دواتر كورد له‌ قۆناغی كۆچه‌رێتیه‌وه‌ به‌ره‌و نیشته‌جیبوون چووه‌و توانیوومانه‌ گوند درووست بكه‌ین و تیایدا نیشته‌جێ بین.

 سه‌رچاوه‌ى ژیان له‌و قۆناغه‌دا كشتوكاڵ و ئاژه‌ڵدارى بووه‌. پاشان شارۆچكه‌و شارمان درووست كردووه‌، ئه‌گه‌ر له‌ رووى كۆمه‌ڵناسیه‌وه‌ بتوانرێت شووناسی شار بدرێت به‌وه‌ى ئێمه‌ به‌ناوى شاره‌وه‌ هه‌مانه‌. كه‌ نیشته‌جیبووین دواتر له‌ درێژه‌ى مێژووماندا خانوو،ئاته‌شگه‌و، په‌رستگاو دواتریش بیناو شه‌قام و قوتابخانه‌و نه‌خۆشخانه‌و مزگه‌وت و ئاپارتمان و باخچه‌و یاریگه‌و پردو مه‌له‌وانگه‌و تونێل و به‌نداویشمان درووست كردووه‌ ، كارگه‌و پاڵاوگه‌ى نه‌وتمان بنیادناوه‌... زۆرێك له‌ پێداویستیه‌كانی به‌رهه‌مهێنان و پێداویستیه‌كانی ژیانمان درووستكردووه‌و ئێستا زۆر بنه‌ماى مادیمان هه‌یه‌... به‌ڵام ئێمه‌ قه‌یرانێكی سه‌خت و خنكێنه‌رمان هه‌یه‌ ئه‌ویش قه‌یرانی په‌یامه‌، په‌یامی ئایینی ، په‌یامی كۆمه‌ڵایه‌تی، په‌یامی نه‌ته‌وایه‌تی و په‌یامی كوردایه‌تی، به‌ڵێ ئێمه‌ گه‌لێكی بێ په‌یامین، شتێك نیه‌ یه‌كمان بخات. ئێمه‌ خاوه‌نی كتێب یان په‌یامێكی پیرۆز نین كه‌ هه‌موومان كۆبكاته‌وه‌. 

جوله‌كه‌ خاوه‌نی كتێبی پیرۆزى ته‌وراتن و ئه‌وه‌ش بووه‌ته‌ بنه‌ماى یه‌كێتی و یه‌كبوونیان، مه‌سیحیه‌كان خاوه‌نی ئینجیلن، عه‌ره‌به‌كان خاوه‌نی قورئانن و هاتووه‌ بۆ ئه‌وه‌ى عاقڵیان بكات و یه‌كیان پێبگرێت. ئێرانیه‌كان یان فارسه‌كان خاوه‌نی په‌یامی ته‌شه‌یوعن كه‌ بووه‌ته‌ گه‌وهه‌رى یه‌كێتی و یه‌كبوونیان، توركه‌كان خاوه‌نی په‌یامی توركێتی و رۆحی ئه‌تاتوركن. 

 ئه‌ى ئێمه‌ى كورد خاوه‌نی چین؟ بێگومان ئێمه‌ خاوه‌نی هیچ په‌یامێك نین. زه‌رده‌شتیه‌تمان له‌بیركردوو به‌ ئاگرپه‌رستی ده‌زانین. ئێزیدى به‌ شه‌یتان په‌رستی ناوده‌به‌ین و ئایینی یارسان به‌ په‌راوێزو لادان ناوزه‌ن ده‌كه‌ین. ئه‌و سه‌ركردانه‌ى سوپاى فه‌تح كه‌ به‌ ده‌ستی باپیرانی ئێمه‌ كوژراون، ئه‌وان شه‌هیدن و ئێستا كراون به‌ شه‌خس و ئێمه‌ بۆ نزا ده‌چینه‌ سه‌ریان، ئه‌و باپیرانه‌شمان كه‌ به‌ده‌ستی ئه‌وان كوژراون ئێستا به‌ كۆڕه‌كانیان ده‌گوترێت گۆڕه‌ جوله‌كه‌و نه‌فره‌تیان لێده‌كرێت.

 با لێره‌وه‌ سه‌یرى خۆمان بكه‌ین... ئایا ده‌بێ میلله‌تێكی تر هه‌بێت ئه‌ویتر بپه‌رستێـت و سوكایه‌تی به‌ باپیره‌ى خۆى بكات؟  په‌یامی ئیسلامیش كه‌ له‌ رێگاى فه‌تحه‌وه‌ گه‌یشتووه‌ته‌ كوردستان و ئێمه‌ى كورد كردومانه‌ به‌ ئایینی خۆمان، به‌ڵام درۆى له‌گه‌ڵ ده‌كه‌ین و له‌راستیدا ئیسلام بۆ كورد نه‌بووه‌ته‌ بنه‌ماى یه‌كێتی و یه‌كبوون، ئێمه‌ ته‌نیا لایه‌نی موجه‌ره‌دى په‌رستنمان له‌ ئیسلام وه‌رگرتووه‌و ئه‌وه‌ى په‌یوه‌ندى به‌ توحیده‌وه‌ هه‌یه‌، ئه‌وه‌ى په‌یوه‌ندى به‌ دنیاوه‌ هه‌یه‌ پشتمان تێكردووه‌، ئێمه‌ ته‌سه‌وفمان بۆ ململانێ و لێدانی یه‌كترى به‌كارهێناوه‌،  كه‌واته‌ ئێمه‌ له‌گه‌ڵ بنه‌ماى ئیسلام بۆ توحید راستگۆنه‌بووین و به‌و پێیه‌ درۆمان له‌گه‌ڵ بنه‌ماى ئیسلام كردووه‌، به‌ تایبه‌تی ئه‌و به‌شه‌ى كه‌ به‌شه‌ گرنگه‌كه‌یه‌تی بۆ كوردو باسی توحید و كارى دنیایی و ده‌وڵه‌تدارى ده‌كات.

 ئێمه‌ ماركسیزم نه‌یتوانی بمانكاته‌ یه‌كه‌یه‌كی یه‌كگرتوو، مه‌سه‌له‌ى نه‌ته‌وایه‌تی یه‌كێتی  بۆ به‌رهه‌م نه‌هێناین. خێل و عه‌شیره‌ت یان په‌یوه‌ندییه‌كانی خوێن و ده‌مار فیدراسیۆنی بۆ درووست نه‌كردین، دەوڵەتی خێڵایه‌تی كوردى پێكنه‌هات و یه‌كگرتن و یه‌كێتی بۆ درووست نه‌كردین به‌ڵكو خوێنی چڕ و  و ده‌مارى گرژ زیاتر كردینی به‌گژ یه‌كترداو په‌رتیكردین. حیزب كه‌ ده‌بوو بمانكاته‌ یه‌كه‌یه‌كی یه‌كگرتوو، ئه‌ویش هۆكارى دابه‌شبوون و په‌رتبوونه‌ بۆمان.

 ئێمه‌ له‌ رابردووه‌وه‌ تاكو ئێستا نه‌بووین به‌ خاوه‌نی پرۆژه‌ى رێنیسانسی نه‌ته‌وه‌یی كوردیی و نه‌مانتوانی له‌و ده‌روازه‌شه‌وه‌ خۆمان دروست بكه‌ینه‌وه‌و له‌ پاشكۆیه‌تی عه‌ره‌ب و تورك و فارس رزگامان بێت و چیتر له‌ شێوه‌ى خزمه‌تكارو به‌رده‌ست و پاشكۆ و ته‌نانه‌ت كلك و جاشی هه‌مه‌چه‌شنی ئه‌واندا نه‌مێنینه‌وه‌. ئێمه‌ له‌ ده‌وڵه‌ته‌كانی ئه‌واندا سه‌رۆك كۆماربین یان سه‌رۆك وه‌زیر ، وه‌زیر بین یان ئه‌ندام په‌رله‌مان، هه‌ر به‌رده‌ست و خزمه‌تكارو بچوك و پاشكۆو په‌راوێزین و هیچ ده‌سه‌ڵات و بوونێكمان نیه‌ چونكه‌ بوونی ئێمه‌ له‌ ده‌وڵه‌ته‌كانی ئه‌واندا بوونی كوردیى نیه‌ به‌ڵكو بوونی خزمه‌تكارانه‌یه‌ بۆ  ئه‌وانی عه‌ره‌بی توركی فارسی.

 به‌ڵێ ئێمه‌ شتێكمان نیه‌ ناوى په‌یامی یه‌كگرتن و یه‌كبوونی كورد بێت، هۆكه‌شی ئه‌وه‌یه‌ ئێمه‌ تا ئێستا نه‌بووین به‌خۆمان، دیاره‌ ناشبین به‌وانى تر، به‌ڵكو تاكو ئێستا هی ئه‌وانی ترین، ئه‌وه‌ش بێگومان په‌یوه‌ندى به‌ كه‌موكورتی له‌ بوونی كه‌سێتی كوردیدا هه‌یه‌. تاكو ئێستاش كه‌ حیزب و رێكخراو و ده‌زگاكانی راگه‌یاندن و نوخبه‌ى سیاسی و حیزبی كوردى خه‌ریكی چه‌له‌حانێی بێ مانان. ئێمه‌ له‌ چوارچێوه‌ى ئه‌م چه‌مكه‌دا ده‌جوڵێین: هه‌راو هوریاى بێ ئامانج: Much Ado About Nothing ، هۆكارى ئه‌مه‌ش ئه‌وه‌یه‌ كه‌ هیچ په‌یامێكیان نیه‌. 

كه‌واته‌ تاكو ئێستا هیچ هێزو رێكخستن و هۆكارێك بۆ یه‌كخستنی كورد درووست نه‌بووه‌. راست و درووست بڵێین بۆ ئه‌مه‌و دواش نه‌ حیزب، نه‌ ئایین، نه‌ رۆشنبیر نه‌ نوخبه‌ى سیاسی نه‌ په‌رله‌مانی ئێستاو نه‌ حكومه‌تی ئێستا هیچیان ناتوانن هۆى یه‌كخستنی كورد بن، به‌ڵكو یه‌ك ده‌روازه‌ هه‌یه‌ كه‌ كورد بكات به‌ یه‌كه‌یه‌كی یه‌كگرتوو واته‌ كورد بكات به‌ نه‌ته‌وه‌ ئه‌ویش ده‌وڵه‌ته‌. بۆیه‌ ئه‌گه‌ر ئێمه‌ ده‌مانه‌وێت ببینه‌ یه‌كه‌یه‌كی یه‌كگرتوو بۆ ئه‌وه‌ى بتوانین خۆمان بپارێزین ته‌نیا یه‌ك رێگامان له‌به‌رده‌ستدایه‌ ئه‌ویش درووستكردنی ده‌وڵه‌تی كوردیه‌. ده‌شێ بڕیاردانی ده‌وڵه‌ت سه‌ركێشی بێت، ده‌شێ مه‌ترسیدار بێت، ده‌شێ رووبه‌ڕووى كێشه‌مان بكاته‌وه‌و بێگومان پاراستن و قوربانیدانیشی ده‌وێت، به‌ڵام تاكه‌ رێگاى رزگاربوونی ئێمه‌یه‌ له‌ مه‌ترسی له‌ ناوچوون، تاكه‌ رێگایه‌ بۆ ئه‌وه‌ى به‌لایه‌نی كه‌مه‌وه‌ له‌ قۆناغی ده‌ره‌وه‌ى مێژووه‌وه‌ بگوازینه‌وه‌ بۆ ناو مێژوو، له‌ قۆناغی پاشكۆبوون و بچووكی عه‌ره‌ب و تورك فارسه‌وه‌ بگوازینه‌وه‌ بۆ قۆناغی له‌سه‌رپێی خۆراوه‌ستان.

 میكانیزمی درووستكردنه‌كه‌ى هه‌رچۆن بێت گرنگ نیه‌، ده‌بێ بڕوا به‌م چه‌مكی میكاڤیلیانه‌ بهێنین: ئامانج پاساوى ئامراز ده‌كات. واته‌ ته‌نیا په‌یامی ده‌وڵه‌ت كورد ده‌كاته‌ یه‌ك و ده‌یپارێزێت، ئیتر ئه‌و ده‌وڵه‌ته‌ كێ دروستی ده‌كات و چۆن درووست ده‌بێت و چۆن ده‌بێت هیچ گرنگ نیه‌. گرنگ ئه‌وه‌یه‌ ده‌وڵه‌تی كوردى درووست بێت، ته‌نانه‌ت ئه‌گه‌ر شه‌یتانیش درووستی بكات، له‌ لوتكه‌ى دیكتاتۆریه‌تیشدا بێت، گرنگ ئه‌وه‌یه‌ درووستببێت. 

با خۆمان به‌و بۆچوونه‌ پوچ و ساویلكانه‌و تووتی ئاسایانه‌ فریوو نه‌ده‌ین كه‌ ده‌ڵێ ئه‌گه‌ر نه‌توانین ده‌وڵه‌تێكی دیموكراسی دروست بكه‌ین ئه‌وا نه‌بوونی ئه‌و ده‌وڵه‌ته‌ باشتره‌ له‌ بوونی. حه‌قه‌ جه‌ماوه‌ر فریوو نه‌ده‌یه‌ن چونكه‌ له‌و نزیكه‌ى 206 ده‌وڵه‌ته‌ى كه‌ ئێستا له‌ جیهاندا هه‌ن تاكه‌ یه‌ك ده‌وڵه‌تیان به‌ دیموكراتی له‌ دایك نه‌بوون، به‌ڵكو  ئه‌وانه‌یان كه‌ دیموكراسین دواى درووستبوونیان و به‌ ماوه‌ى درێژخایه‌ن، خه‌باتی جه‌ماوه‌ریی كردوونی به‌ دیموكراسی نه‌ك وتارو نووسین و قسه‌و گفتوگۆو ئامۆژگارى رۆشنبیران و بیرمه‌ندان و  ئه‌و سیاسی و حیزبیانه‌ى كه‌ تا سه‌رئێسقانیان بارگاویه‌ به‌ تاوان و خوێنڕشتن و دزى و گه‌نده‌ڵی و موماره‌سه‌ى دژ به‌ مرۆڤــ، كه‌چی زۆر رووقایمانه‌ باسی درووستكردنی ده‌وڵه‌تی دیموكراتی ده‌كه‌ن . ئه‌وانه‌ كه‌ له‌به‌رپرسیارێتی حیزبه‌كانیاندان به‌س كه‌سانی بچووك وملكه‌چ له‌ ده‌ورى خۆیان كۆده‌كه‌نه‌وه‌وئه‌وانه‌ى خاوه‌ن راوبۆچوونن له‌ناو حیزبه‌كانیاندا په‌راوێزیان ده‌خه‌ن كه‌چی باسی درووستكردنی ده‌وڵه‌تی دیموكراتی ده‌كه‌ن، ئه‌گه‌ر ئه‌مه‌ش ئه‌ڵقه‌یه‌كی ترى گه‌وجاندنی میلله‌ت نیه‌ ئه‌ى چیه‌؟ـ . . له‌ ده‌ره‌وه‌ى ده‌وڵه‌ت كورد هه‌رچی بكات و هه‌رچی بڵێت بێجگه‌ له‌ قسه‌ى بێ مانا و بێجگه‌ له‌ به‌فیڕۆدانی تواناو وزه‌و خوێنی لاوانی كورد هیچی تر نیه‌. 

كه‌واته‌ په‌یامی كوردى ته‌نیا له‌ دروستكردنی ده‌وڵه‌تدا به‌رهه‌م دێت. هه‌موو ئه‌وه‌شی كه‌ كورد هه‌یه‌تی  به‌ خودى خۆى و به‌ زمان و شووناس و كه‌لتوورو وڵاته‌كه‌شیه‌وه‌ ته‌نیا و به‌س ته‌نیا به‌ دروستكردنی ده‌وڵه‌تی كوردى ده‌پارێزرێت، كه‌ دروستكردنی ده‌وڵه‌تیش ته‌نیا به‌ په‌یامی كوردایه‌تی و له‌ بنیادنانی گوتارى نه‌ته‌وه‌یی كوردى خاوه‌ن شووناسدا ده‌بێت نه‌ك چه‌له‌حانێ و گوتارو قسه‌ى پوچ و بێ گه‌وهه‌رى ئێستاى حیزب و نوخبه‌و رۆشنبیرى كوردى. واته‌ ئه‌گه‌ر كورد ده‌یه‌وێت بمێنێته‌وه‌و بێته‌ ناو مێژووه‌وه‌ ده‌بێ ببێته‌ خاوه‌نی په‌یامی ده‌وڵه‌ت كه‌ ئه‌ویش به‌ بنیادنانی پرۆژه‌ى ده‌وڵه‌ت و جێبه‌جێكردنی ئه‌و پرۆژه‌یه‌ ده‌گاته‌ ئه‌نجام.

 كورد بۆ ئه‌وه‌ى ببێته‌ یه‌كه‌یه‌كی یه‌كگرتوو پێویستی به‌ ده‌وڵه‌تێكه‌ به‌هێزى یاسا ئه‌وه‌ى به‌سه‌ردا بسه‌پێنێت، به‌ دروستكردنی دامه‌زراوه‌كانی كۆمه‌ڵگه‌ى هاوچه‌رخ زه‌مینه‌ى ئه‌و یه‌كێتی و یه‌كبوونه‌ پێكبێت، نه‌ك به‌ عه‌قڵی به‌سه‌رچووى حیزب و نوخبه‌ى سیاسی ئێستاى كوردستان كه‌ ئاشكرایه‌ كۆى حیزبه‌كان جێگره‌وه‌ى دامه‌زراوه‌ى خێڵ و عه‌شیره‌تن، نوخبه‌ى سیاسیش سه‌رۆك خێل و عه‌شیره‌ت و پیاوماقوڵانی ئه‌و دامه‌زراوانه‌ن. هه‌رچه‌نده‌ كاتێ نوخبه‌ى سیاسی كوردى به‌راورد بكه‌ین به‌ سه‌رۆك خێڵ و عه‌شیره‌ته‌كانی پێشترى كورد هه‌ست ده‌كرێت ناهه‌قی له‌گه‌ڵ سه‌رۆك خێڵ و عه‌شیره‌ته‌كاندا ده‌كرێت چونكه‌ به‌لایه‌نی كه‌مه‌وه‌ ئه‌وان هه‌ندێ پێوانه‌و بنه‌ماى جێگیرى كارپێكردن و مامه‌ڵه‌و ره‌فتاریان هه‌بوو به‌ڵام حیزب و نوخبه‌ى سیاسی ئێستاى كوردستان هیچ به‌هاو بنه‌مایه‌كی جێگیرى كارپێكردنی نیه‌ بێجگه‌ له‌ به‌رژه‌وه‌ندیه‌ ته‌سكه‌كانی خۆى و رازیكردنی ئاغا عه‌ره‌ب و تورك و فارسه‌كانیان. 

 

PM:03:16:14/05/2017




ئه‌م بابه‌ته 498 جار خوێنراوه‌ته‌وه‌‌

Nike Air Huarache Run Ultra chaussures de tennis,Nike Air Jordan Sky High OG Chaussures,Air Max 1 Ultra SE chaussures de tennis,Air Max 2016 Chaussures,2017 Nike Air Max,Nike Air Max 90 chaussures de tennis
NIKE AIR PRESTO ULTRA FLYKNIT,NIKE AIR PRESTO ULTRA FLYKNIT,NIKE AIR ZOOM ALL OUT,NIKE BLAZER MID MEN,NIKE CLASSIC CORTEZ MEN,NIKE CHUCK POSITE