بەڵێندەران چەند داواکارییەک ئاراستەی حکومەت دەکەن


ئا: زریان محەمەد

بەمەبەستی باشکردنی رەوشی بەڵێندەران لەشاری سلێمانی لقی سلێمانی یەکێتی بەڵێندەران چەند داواکارییەک ئاراستەی حکومەتی هەرێم دەکەن.

میران کامل، وتەبێژی لقی سلێمانی یەکێتی بەڵێندەران بەڕۆژنامەی بازرگانی‌و پیشەسازی راگەیاند "کێشەکانی بەڵێندەران لەسەرەتای ساڵی ٢٠١٤، بەهۆی قەیرانی دارایی‌و شەڕی داعش بوە هۆی وەستانی پرۆژەکان‌و مایەپوچ بوونی زیاد لە ٨٥٪ بەڵێندەرانی کوردستان".

راشیگەیاند "لەئێستادا پێویستە حکومەت بەدەنگ پرۆژەکانەوە بێت کە هەمووی بۆ خزمەتگوزاری هاوڵاتیانی کوردستانە وەک وەفایەک بەرامبەر کۆمپانیاکان کە چەند ساڵە داوای قەرەبویان نەکردووە".

ئاماژەی بەوەشدا لە ئێستادا داواکاری بەڵێندەران لەچوارچێوەی یاساو ڕێنمایەکان‌و چاکسازیەکان حکومەتدا داوا دەکەین، پۆلێنکردنی پرۆژەکان بەپێی جۆرو ڕێژەی تەواوبونی پرۆژەو دانانی ریزبەندیەک بۆ دەستبەکار بونەوە بەپێی بەرنامەیەک کە هەماهەنگ بین لەوەی زۆرترین پرۆژە دەست بەکار بێت بەپێی بەرنامەیەکی شەفاف‌و گونجاو، ڕێکخستنەوەی پرۆژەی لیژنەی پەرەپێدانی ناوچە جیاجیاکان،  دەست پێکردنەوەی ئەو پرۆژانەی کەلەگەڵ دەستبەکاربونی کابینەی ٩ حکومەتی هەرێم چەند پرۆژەیەک لەشاری سلێمانی دەست بەکاربون دوای ماوەیەکی کەم وەستێندران.

وتەبێژەکەی بەڵێندەران جەختی لەوەش کردەوە "داوای ئەوەش دەکەین هەموو ئەو پڕۆژانەی کە بەفەرمانی حکومەت لەساڵی ٢٠٢٠ کاری کردووەو دوای چوارمانگ وەستێندرا، سەرف کردنی پێشینەکانیان‌و ڕێکخستنەوەیان‌و رێکخستنی تەئمیناتی پرۆژەکان‌و دانانی بەرنامەیەک بۆ دانەوەی بەچەند قیستێک‌و ڕێکخستنی چەکی بەڵێندەران بەپێی بەرواری تەواوکردنی کارو دانانی پارە لەبانکەکانداو پێدانەوەی بە بەڵێندەران بەپێی بەرنامەیەکی گونجاو مانگانەو بەکارهێنانی ئەو پارەیە بۆ کاری پێدانەوەی قەرز بەحکومەت وەک باجی زەریبەو کاروباری کۆمەڵایەتی ئاوو کارەباو لێخۆشبون لەو باجەی کە بەزەریبەو کاروباری کۆمەڵایەتی دەدرێت".

لەکۆتایدا میران داوا دەکات لێخۆشبونی بەڵێندەران لەغەرامەی تائخیرو غەرامات کە بەهۆی قەیرانەوە توشی هاتووە.



PM:04:34:11/09/2021




ئه‌م بابه‌ته 168 جار خوێنراوه‌ته‌وه‌‌