ئه‌ندامێكی ئه‌نجومه‌نی یەکێتی پیشەسازی عێراق سەردانی ژووری بازرگانی و پیەشەسازی سلێمانی دەکات

 ئه‌ندامێكی ئه‌نجومه‌نی یەکێتی پیشەسازی عێراق سەردانی ژووری بازرگانی و پیەشەسازی سلێمانی کرد و لەلایەن سەرۆک و ژمارەیەک لە ئەندامانی ئەنجومەنی کارگێری ژووری بازرگانی و پیشه‌سازی سلێمانیه‌وه‌  پێشوازی لێکرا.
 
لە کۆبوەنەوەیەکدا کە ھەریکە لە سیروان محەمەد، سەرۆکی ژوور و بەختیار مه‌حمود مه‌لا ئەمین و دلاوەر عەلی سۆفی كه‌ریم و ئاراس عه‌بدولكه‌ریم مه‌عروف و کەمال سەعید تەھا کۆیی، ئەندامانی ئەنجومەنی کارگێری ژووری بازرگانی و پیشەسازی سلێمانی ئامادەبوون، عەلا موحسین، ئه‌ندامی ئه‌نجومه‌نی یەکێتی  پیشەسازی عێراق ڕایگەیاند،  ''خۆشاحاڵین کە پێشەنگای مێد ئین عێراق لە سلێمانی بەرێوەدەچێت، ھیوادارین پێشەنگاکە ببێتە دەروازەیەک بۆ یەکتر ناسینی بازرگانان و پیشەسازانی عێراق لەگەڵ خاوەن کارگەکانی شاری سلێمانی و بتوانرێت چەندین گرێبەستی کارکردنی ھاوبەش واژۆ بکرێت و ھەردولا بە بەرھەمەکانی یەکتر ئاشنابن''.

ئاماژەی بەوەشدا، ھاوڵاتیانی باشور و ناوەڕاستی عێراق زۆر بە گرنگیەوە لە بەرھەمی ناوخۆی عێراق دەڕوانن بە بێ جیاوازی کردن لە نێوان کارگەکانی باشور و باکوری وڵاتدا، ئەو کاڵایانەی لە ناوخۆ بەرھەمدێت خواستێکی زۆری لەسەرە، حکومەتیش لە ڕێگەی دەرکردنی یاسایی پاراستنی بەرھەمی ناوخۆ توانیوێتێ یارمەتی گەشەکردنی کەرتی پیشەسازی بدات لە عێراق.

لای خۆشیەوە، سیروان محەمەد سەرۆکی ژووری بازرگانی و پیشەسازی سلێمانی ڕایگەیاند، ''شاری سلێمانی لەسەدا ٣٢ی کۆی پیشەسازی عێراقی لەخۆگرتووە، لە شارەکەمان چەندین کارگەی گەورەی چیمەنتۆ و شیش و قیر و دەرمان و قوتوی کانزایی، جبس و سرکەو زەیت و شیرەمەنی، ھەیە کە بە شێکیان بەرھەکەکانیان دەنێرنە دەرەوەی عێراق، ھیوادەرین بتوانن کارئاسانی زیاتر بۆ ئەو خاوەن کارگانە بکەن کە دەیانەوێت  کاڵاکانیان بنێرنە شارەکانی ناوەڕاست و باشوری عێراق و کار بکەن بۆ لابردنی ئاستەنگەکان تاکو بتوانرێت کەرتی پیشەسازی پێش بخرێت''.

ئاماژەی بەوەشدا، لە ئێستادا سەرقاڵی پرۆژه‌ی گه‌نجینه‌کانی ژووری بازرگانی و پیشه‌سازی سليمانین کە بریتییه‌ له‌ دروستکردنی 586 کۆگای هاوچه‌رخ به‌ ڕوبه‌ری جیاواز، پرۆژه‌که‌ له‌سه‌ر 400 دۆنم زه‌وی له‌ سلێمانی له‌ نزیک گوندی ژاڵه‌ی سه‌روو جێبه‌جێ ده‌کرێت،دابه‌ش بوون به‌سه‌ر چه‌ند زۆنێکدا، لەدروستکردنی پرۆژەکەدا هەموو ستاندار و پێوەرێکی جیهانی تێدا ڕەچاو دەکرێت، له‌ ئێستادا کارکردن تیایدا به‌رده‌وامه‌، بە تەواو کردنی شارەکەمان دەبێتە سەنتەرێکی گرنگ لەسەرتاسەری عێراقدا.


PM:04:18:11/08/2021




ئه‌م بابه‌ته 240 جار خوێنراوه‌ته‌وه‌‌