لە ئەگەری رێككەوتنی ناوكیی یەدەگی دراوی ئێران دوو هێندە زیاد دەكات

دامەزراوەیەكی نێودەوڵەتیی بواری دارایی لە پاریس ئاشكرای كرد، ئەگەر رێككەوتنی ناوكیی نێوان ئێران و وڵاتانی چوار كۆ یەك لەلایەك و ئەمەریكا لەلایەكی تر زیندوو بكرێتەوە، ئەوا یەدەگی دراوی ئێران تا ساڵی 2023 بۆ دوو هێندە زیاد دەبێت.

بەگوێرەی راپۆرتەكە، كۆی یەدەگی دراوەكە تا دوای دوو ساڵ دەگاتە 140 ملیار دۆلار و گەشەی ئابووری لەمساڵدا بۆ 3.5% بەرز دەبێتەوە، بۆ ساڵەكانی 2022 و 2023 دەگاتە 4% .، ئەگەر رێككەوتنەكە گشتگیر بێت، ئەوا دیسان ژمارەكان گۆڕانكارییان بەسەردا دێت و ئەمساڵ گەشەی ئابووری  بۆ 4.3% و بۆ دوو ساڵی داهاتووش بۆ سەرووی 6% گۆڕانكاری  بەسەردا دێت.
 
هاوكات پێشبینی ئەوەی كردووە، رێژەی بێكاری لە ئێران هەر بە بەرزی بمێنێتەوە و 20% دانەبەزێت. هەڵبەت نەمانی سزا ئابوورییەكان دژی ئێران، هۆكارە لەوەی لەو وڵاتە كەرتی تایبەتیش گەشە بكات، چونكە نیوەی پیشەكان پێوەندی بە كەرتی تایبەتەوە هەیە.

بەگوێرەی رادیۆ فەردا، ئێران بەر لە سزاكان رۆژانە دوو ملیۆن و 500 هەزار بەرمیل نەوتی دەفرۆشت، بەڵام ساڵی رابردوو بۆ 320 هەزار بەرمیل دابەزی، لە پێنج مانگی یەكەمی ئەمساڵیشدا رۆژانە 650 هەزار بەرمیلی هەناردە كردووە و 10%ی ئابووری ئێران پێكدێنێت.

هاوكات پێشبینی ئەوەش كراوە ئەگەر سزاكان لانەبرێن و هیچ رێككەوتنێك روو نەدات، ئەوا گەشەی ئابووری ئێران لەمساڵدا 1.8% دەبێت.


PM:12:16:28/06/2021




ئه‌م بابه‌ته 381 جار خوێنراوه‌ته‌وه‌‌