عێراق پێنجەمین وڵاتە لە رووی یەدەگی نەوتەوە

دامەزراوەی " GFP"، لە راپۆرتی ساڵانەی خۆیدا لە بارەی وڵاتانی بەرهەمهێنی نەوت و یەدەگی نەوت لە دنیادا، ئاشكرای دەكات كە عێراق لە پلەی پێنجەمی زیاترین یەدەگی دۆزراوەی نەوتە لە جیهان.

بەگوێرەی راپۆرتەكەی " GFP"، ڤەنزوێلا لە پلەی یەكەم دێت كە 24.8%ی یەدەگی دۆزراوەی نەوتی جیهانی هەیە، دوای ئەویش سعوودیە دێت بە 22.1% و پاشان كەنەدا بە 13.29% و ئینجا ئێران بە 12.8% دێت. هەرچی عێراقە لە پلەی پێنجەم دێت كە بەگوێرەی راپۆرتی " GFP" بە رێژەی 12.1%ی یەدەگی نەوتی جیهانی هەیە و بە 147 ملیار و 400 ملیۆن بەرمیل خەملێنراوە، دوای ئەویش كوێت بە 8.4% و ئیمارات بە 7.21%، رووسیا 5.82%، لیبیا بە 3.05% و نێجیریا 2.67%.

لە دنیادا جگە لەو 10 وڵاتە بەرهەمهێنەی نەوت، 88 وڵاتی تر لە دنیادا نەوت بەرهەم دەهێنن، ئەسیوپیا كە كەمترین یەدەگی نەوتی لە دنیا هەیە، ئەویش 438 هەزار بەرمیل نەوتی یەدەگە.

لە راپۆرتی گۆڤارەكە روون نەكراوەتەوە هەژماركردنی یەدەگی نەوتی عێراق، هەرێمی كوردستانیشی لەگەڵ هەژمار كراوە یان نا، بەڵام بە گشتی " GFP" ئیش لەسەر ئاستی دەوڵەت دەكات. ئەمەریكایش كە ئێستە نزیك بووەتەوە لە بەرهەمهێنانی 11 ملیۆن بەرمیلی رۆژانە، لە ریزبەندی 12هەمینی دنیا دێت بە رێژەی 1.54% كە دەكاتە 20 ملیار و 970 ملیۆن بەرمیل نەوت.


AM:11:18:10/02/2019




ئه‌م بابه‌ته 119 جار خوێنراوه‌ته‌وه‌‌