بە ھۆی کەمی ئاو بەرھەمی دانەوێڵە لە عێراق کەمیکردووە

وەزارەتی پلاندانانی عێراق رایگەیاند کە لە میانی ئەمساڵدا بە ھۆی کەمی ئاو، بەرھەمی دانەوێڵە بە رێژەی ٤٥،٣ لەسەدا کەمیکردووە.

بە پێی راپۆرتێک کە لە لایەن دەزگای ئامار سەربە وەزارەتی پلاندانان بڵاوکراوەتەوە ئاماژە بەوە دراوە، بەرھەمی گەنم لە میانی ئەمساڵدا لە عێراق گەیشتووەتە دوو ملیۆن و ١٧٨ ھەزار تۆن کە ئەمەش بە بەراورد بە ساڵی ٢٠١٧ بە رێژەی ٢٦،٨ لەسەدا کەمیکردووە.

ھەر بە پێی راپۆرتەکە، ھەر لە میانی ئەمساڵدا، بەرھەمی جۆ گەیشتووەتە یەک ملیۆن ٩١ ھەزار تۆن کە ئەمەش بە بەراورد بە ساڵی ٢٠١٧ بە رێژەی ٢٦،٧ لەسەدا کەمیکردووە.

لە راپۆرتەکەدا ئەوەش خراوەتەڕوو کە بە ھۆی کەمی ئاو و باران بارین لە عێراق، بەرھەمی دانەوێڵە لەمساڵدا کەمیکردووە.

بە ھۆی خراپی رەوشی ئەمنی، ئەم ئامارە پارێزگاکانی نەینەوا، ئەنبار و سەڵاحەددین و قەزای حەویجە سەربە پارێزگای کەرکووک ناگرێتەوە.


PM:03:42:24/09/2018




ئه‌م بابه‌ته 193 جار خوێنراوه‌ته‌وه‌‌