سعودیە.. یەكەم هاوردەكاری چەكه‌

پێنتاگۆن ئیمزاكردنی سەودانامەیەكی سەربازیی گەورەی لەگەڵ سعودیەدا بە بەهای ٤٨٠ ملیۆن دۆلار   ئاشكراكرد.

٩٤٥ ملیۆن دۆلار
بەگوێرەی راگەیەنراوێكی پێنتاگۆن، كۆمپانیای فڕۆكەسازیی بۆینگی ئەمریكی بۆندێكی سەربازیی بە بڕی ٤٨٠ ملیۆن دۆلار لەگەڵ سعودییەدا ئیمزاكردووە كە تایبەتە بە پێشكەشكردنی خزمەتگوزاری و نۆژەنكردنەوەی هێزی ئاسمانیی ئەو وڵاتە.
هاوكات كۆمپانیای (ڵۆكید مارتن)یش سەودانامەیەكی بەرگریی گەورەی لەگەل سعودیە و قەتەردا ئیمزاكردووە، كە بەهاكەی دەگاتە ٩٤٥ ملیۆن دۆلار، تایبەت بە فرۆشتنی موشەكی جۆری پاتریۆت بەو دوو وڵاتە.
لەمانگی تشرینی یەكەمی رابردووشدا سعودیە و پێنتاگۆن سەودانامەیەكی تریان ئیمزاكرد تایبەت بە فرۆشتنی ٤٤ سەكۆی موشەكیی جۆری (تاد) و ئوتومبیلی تایبەت بە گواستنەوەی ئەو سەكۆیانە بە سعودیە.
سەودانامەكە فرۆشتنی ٣٦٠ موشەك و ١٦ ناوەندی فەرماندەیی و حەوت راداریشی لەخۆگرتبوو.

به‌رامبه‌ر بەو سیاسەتانەی کە لە یەمەن هەیە
راگەیاندنی ئەو سەودانامە زەبەلاحانە لەكاتێكدایە كە سیستمی بەرگریی موشەكیی پاتریۆت كاریگەرییەكی ئەوتۆیان نەبووە لە ریگرتن بەو موشەكانەی لەناو خاكی یەمەنەوە ئاراستەی سعودیە كراون.
پێشتر رۆژنامەی واشنتۆن پۆست لە راپۆرتێكیدا ئاماژەی بەوە كردبوو: ئەمریكا و بەریتانیا لە چەند ساڵی رابردوودا سوودمەند بوون لە فرۆشتنی چەك بە سعودییە، لەكاتێكدا داكۆكیكاران لە مافەكانی مرۆڤ نیگەرانن لەوەی سعودییەی هەر بەتەنها چەكی لەو دوو وڵاتە نەكڕیبێت، بەڵكو بێ دەنگیی ئەو وڵاتانەشی كڕیبێت بەرامبەر بەو سیاسەتانەی لە یەمەن و ناوچەكەش دەیانگرێتەبەر.

ئەمریكا و فەڕەنساو بەریتانیا
پەیمانگەی ستۆكهۆلم بۆ ئاشتیی نێودەوڵەتیش لە راپۆرتێكیدا ئاماژەی بەوە كردبوو: سەرەڕای دابەزینی بەرچاوی نرخی نەوت ، ساڵی رابردوو وڵاتانی ناوچەكە بەردەوام بوون لەسەر هاوردەكردنی چەك.
هەر بەگوێرەی ئەو داتایانە، هێشتا سعودیە یەكەمین هاوردەكاری چەكە لەسەر ئاستی جیهان، و ئەمریكا و فەڕەنساو بەریتانیاش زۆرترین چەكیان هەناردەی ئەو وڵاتانە كردووە.

كوردستانی نوێ


PM:12:33:25/12/2017




ئه‌م بابه‌ته 258 جار خوێنراوه‌ته‌وه‌‌